Një ngjarje e rëndë ka tronditur mesditën e së martës fshatin Sllatinë të Fushë Kosovës, ku një burrë është gjetur pa shenja jete në ambientet e motelit “Berati”. Viktima, i identifikuar si 60-vjeçari C.K, u gjet pa ndjenja në një nga dhomat e këtij objekti që ndodhet përgjatë rrugës magjistrale për në Pejë.
Alarmi u ngrit rreth orës 13:00 të datës 12 maj, kur Policia mori informacionin e parë për një person të alivanosur. Megjithëse ekipi mjekësor mbërriti me shpejtësi në vendngjarje, përpjekjet për t’i dhënë ndihmën e parë rezultuan të kota, pasi mjekët u detyruan të konstatonin vdekjen e tij të menjëhershme.
Nga këqyrja paraprake e trupit, ekspertët mjekësorë nuk kanë vërejtur shenja dhune apo lëndime që mund të sugjeronin një akt kriminal. Burime pranë grupit hetimor bëjnë me dije se pista kryesore e hetimit mbetet ajo e një vdekjeje natyrale, si pasojë e një arresti kardiak.
Në vendin e ngjarjes kanë zbarkuar forca të shumta të Policisë, përfshirë njësinë e hetimeve dhe forenzikën, të cilët kanë bërë ekzaminimin e plotë të lokacionit. Për të hedhur më shumë dritë mbi momentet e fundit të 60-vjeçarit, autoritetet kanë marrë në pyetje dy dëshmitarë. Mes tyre është edhe një grua 52-vjeçare me inicialet D.G., e cila e shoqëronte viktimën në momentin kur ndodhi ngjarja.
Rasti tashmë ka kaluar në duart e Prokurorit për Krime të Rënda, i cili ka urdhëruar nisjen e procedurave nën cilësimin “Hetim i vdekjes”. Trupi i pajetë dhe provat e mbledhura në vendngjarje do të jenë pjesë e procesit hetimor që synon të zbardhë deri në detaje çdo rrethanë që çoi në këtë fund tragjik për Cenë Kadrijën.