Rolando Maran i ka dhënë një kthesë të papritur karrierës së tij. Në moshën 62-vjeçare është bërë trajneri i ri i Shqipërisë, duke përjetuar për herë të parë një eksperiencë larg Italisë dhe mbi të gjitha në krye të një kombëtareje.
Ky vendim shënon ndryshim rrënjësor perspektive për një trajner të mësuar të përballet me objektiva shumë të ndryshëm, nga mbijetesa te ngjitja në kategori. Tani, në vend të kësaj, horizonti është ai i kualifikimeve për Botërorin dhe Europianin, në një kontekst krejtësisht të ri: “Kur Shqipëria më thirri u emocionova. Menjëherë ndjeva një ndjenjë të fortë përkatësie dhe krenarie kombëtare”, – shpjegoi Maran për “Gazzetta dello Sport”, duke treguar motivet që e shtynë të pranonte ofertën kuqezi.
Trajneri nga Trento ka vendosur tashmë të transferohet në Tiranë, ku do të nisë menjëherë punën në fushë, duke ruajtur lidhjen me Italinë përmes familjes. Një hap që konfirmon vullnetin për ta jetuar plotësisht këtë eksperiencë: “Do të jetoj në Tiranë. Është e rëndësishme për mua të përfshihem plotësisht në këtë realitet”.
Në karrierën e tij si trajner, Maran ka ndërtuar një reputacion të fortë dhe diskret, shpesh larg vëmendjes së madhe, por gjithmonë efektiv. Te Catania ka shkruar sezone historike, ndërsa me Chievo Verona ka garantuar stabilitet dhe mbijetesë të vazhdueshme, duke forcuar imazhin si trajner i besueshëm dhe pragmatik. Edhe te Brescia ka lënë gjurmë në një kontekst të vështirë.
“Nuk kërkoj skenën, më pëlqen të punoj”, – tha ai, duke përshkruar profilin e tij si “trajner punëtor i futbollit italian”. Aventura e tij e re sjell ndërmend edhe përvojën e atyre që kanë shkruar historinë e fundit të kombëtares ballkanike, si Gianni De Biasi, i cili e çoi Shqipërinë drejt kualifikimit historik në “Euro 2016”.
Maran tha se e kishte kontaktuar para se ta pranonte ofertën shqiptare: “Isha një nga të parët që e telefonova. Më tha të mos kisha dyshime, se është një zgjedhje e drejtë dhe se Shqipëria është një realitet me krenari dhe identitet të madh. Tani dua të arrij të njëjtin objektiv si De Biasi”.
Në aspektin njerëzor dhe teknik, Maran ka kujtuar gjithashtu karrierën e tij duke përmendur disa nga lojtarët më të fortë që ka stërvitur: “Papu Gómez, Nicolò Barella, Darijo Srna, Radja Nainggolan, Almirón dhe Pandev në fund të karrierës”.
The post Maran rrëfehet në 360 gradë: Shpresoj të bëj si De Biasi te Shqipëria, ja pse do të jetoj në Tiranë appeared first on Telesport.