Olivier Giroud po përgatitet për aktin final të karrierës së tij. Në një intervistë për “L’Équipe”, para ditëlindjes së tij të 40-të, sulmuesi i Lille la të kuptohet se do t’i japë fund karrierës në fund të sezonit.
“Mund të vazhdojmë t’i bëjmë intervistat me kënaqësi edhe vitin tjetër, por besoj se ky do të jetë me shumë gjasa sezoni im i fundit si futbollist. Prandaj po e shijoj çdo moment,” deklaroi fituesi i Kupës së Botës 2018.
Si profesionist që nga viti 2006, kur debutoi në Ligue 2 me Grenoble, Giroud ka ndërtuar një karrierë tejet të suksesshme që përfshin Francën, Anglinë, Italinë dhe Shtetet e Bashkuara të Amerikës.
Pas shpërthimit të tij me Montpellier, të cilin e udhëhoqi drejt një titulli historik në Ligue 1 në vitin 2012, ai luajti për Arsenal, Chelsea, Milan, Los Angeles FC dhe së fundmi për Lille.
Në koleksionin e tij të trofeve, krahas titullit francez, përfshihen një kampionat i Serie A me Milan, një titull i Champions League dhe një i Europa League me Chelsea, katër FA Cup me Arsenal dhe US Open Cup e fituar me Los Angeles FC.
Me kombëtaren franceze, nga e cila u tërhoq në vitin 2024, Giroud shkroi kapituj të pashlyeshëm në historinë e “Les Bleus”: 137 paraqitje, 57 gola dhe, mbi të gjitha, triumfi në Kupën e Botës 2018 që vulosi statusin e tij si një nga sulmuesit më të mëdhenj të brezit të tij.
Nëse synimet e tij mbeten të pandryshuara, sezoni aktual do të jetë i fundit i një karriere që zgjat prej gati dy dekadash, e karakterizuar nga trofe, rekorde dhe suksese në nivelet më të larta të futbollit ndërkombëtar.
The post “Me shumë gjasa, ky do të jetë sezoni im i fundit, ndaj po e shijoj çdo moment” appeared first on Telesport.