Vendet e G7 kanë vendosur të nxjerrin naftë dhe produkte të naftës nga rezervat strategjike, në përpjekje për të stabilizuar tregun dhe për të zbutur presionin mbi çmimet e karburanteve.
Masa parashikon lirimin e deri në 100 milionë fuçive naftë dhe produkteve të naftës nga rezervat strategjike të vendeve pjesëmarrëse. Operacioni pritet të zgjasë rreth katër muaj dhe do të koordinohet përmes Agjencisë Ndërkombëtare të Energjisë.
Një pjesë e konsiderueshme e rezervave të dizelit pritet të dalë në treg që në javët e para, me synim rritjen e furnizimit dhe uljen e presionit mbi tregun e karburanteve.
Ekspertët vlerësojnë se vendimi mund të ndikojë në uljen e çmimeve në afat të shkurtër, veçanërisht të dizelit, por paralajmërojnë se efekti mund të jetë i përkohshëm. Nxjerrja e rezervave strategjike nuk e zgjidh në mënyrë afatgjatë problemin e furnizimit global dhe rezervat duhet të rimbushen pas përfundimit të masës.
Çmimet e naftës do të vazhdojnë të varen edhe nga prodhimi global, kërkesa, situata gjeopolitike dhe zhvillimet në tregjet ndërkombëtare të energjisë.
Vendimi i G7 synon kështu të krijojë një frymëmarrje të përkohshme për konsumatorët dhe ekonomitë, ndërsa tregjet përballen me pasiguri të lartë rreth furnizimit me energji.
The post G7 nxjerr 100 milionë fuçi naftë nga rezervat strategjike, pritet lehtësim i përkohshëm i çmimeve appeared first on Alsat.