Një pecetë nuk flet. Por, nëse do të mundej, këtë javë do të kishte diçka për të treguar… Më 14 dhjetor 2000, në klubin e tenisit “Pompeia” në Montjuïc, një burrë i shqetësuar priste një përgjigje. Quhej Jorge Messi. Kishte sjellë djalin e tij 13-vjeçar në Barcelonë, kishte kaluar provat dhe kishte pritur me javë për një firmë që nuk erdhi kurrë. Barcelona kishte dyshime. Jorge nuk kishte më vend për dyshime; i duhej siguria që të mos kthehej në Rosario duarbosh.
Përballë tij ishte Carles Rexach, sekretari teknik i klubit. Nuk kishte një kontratë me vete. Mori të vetmen gjë që kishte mbi tavolinë; një pecetë letre. Shkroi se, nën përgjegjësinë e tij, angazhohej të nënshkruante me lojtarin Lionel Messi Cuccittini. Josep Maria Minguella dhe Horacio Gaggioli firmosën gjithashtu si dëshmitarë të një premtimi pa vlerë ligjore.
Nuk ishte kontratë. Ishte fjala e një njeriu, e shkruar mbi një pecetë lokali. Për Jorge, mjaftonte. Ai e ruajti si dikush që ruan pasaportën drejt së ardhmes së djalit të tij. Nuk e dinte se vite më vonë ajo copë letre e rrudhur do të shitej në ankand për gati 1 milion dollarë. As nuk e dinte se po mbante dokumentin e parë të karrierës më të madhe në futboll.
Lionel luajti 782 ndeshje për Barcelonën, shënoi 674 gola dhe fitoi 4 Champions League. Gjithçka nisi aty, në një tavolinë në Montjuïc, me një baba që nuk u tërhoq derisa mori diçka të firmosur. Jorge Messi ndërroi jetë të premten, më 7 gusht, në moshën 68-vjeçare. Kur Rexhach e mori vesh, tregoi sërish të njëjtën histori: atë pasdite kur një pecetë i lehtësoi ankthin një babai.
Peceta është ende aty, e vendosur në kornizë, e shitur, e famshme. Jorge nuk është më, por sa herë që dikush e sheh atë, do të shohë gjithashtu një baba që nuk u dorëzua kurrë. Dhe ndoshta ky është kuptimi i vërtetë i asaj pecete. Ajo nuk dëshmon vetëm për Lionel Messin, por për ëndrrën e një babai.
The post PECETA QË NDRYSHOI HISTORINË E FUTBOLLIT, premtimi i babait që nuk u dorëzua kurrë appeared first on Telesport.