Departamenti i Punëve të Brendshme (OVR) në Prilep ka dorëzuar njoftim kundër një nxënësi të një shkolle të mesme në Prilep, për shkak të dyshimit të bazuar për kryerjen e veprës penale “falsifikim kompjuterik”.
I denoncuari, duke u paraqitur rrejshëm si mësues i gjuhës angleze nga një shkollë fillore në Vinicë, krijoi një profil dhe ra në kontakt me një punonjëse në Ministrinë e Arsimit dhe Shkencës (MASH). Ndonëse punonjësja i kishte bërë me dije se bisedat me mësuesit nuk duhet të zhvillohen në rrjetet sociale, ajo i krijoi atij një adresë zyrtare elektronike nga Ministria e Arsimit dhe i dha fjalëkalimet e e-ditarit si administrator nga llogaria e saj e përdoruesit, duke e udhëzuar atë që të koordinonte të gjithë mësuesit.
Në këtë mënyrë, i denoncuari kishte qasje në të gjitha të dhënat e të gjithë profesorëve në nivel shtetëror, duke i koordinuar ata dhe duke i ndihmuar në mbajtjen e ditarit elektronik.
Në periudhën nga viti 2022 deri në nëntor të vitit 2025, deri në momentin kur ish-ushtruesja e detyrës së drejtoreshës e informoi të denoncuarin se një profesoreshë kishte raportuar se dikush po fshinte të dhënat nga ditari elektronik në shkollë, i denoncuari fshiu të gjitha profilet dhe llogaritë e rreme nga rrjetet sociale. Gjithashtu, më vonë u fshi edhe profili i tij nga e-maili zyrtar i Ministrisë së Arsimit.